Senad Ramaj, përvoja austriake që ngriti standardet në Kosovë

Gjilan – Senad Ramaj është një intelektual i mirëfilltë, një personalitet i formuar në vlerat evropiane, i cili kurrë nuk është dorëzuar përballë sfidave të shumta në krye të kompanisë “Eco – Higjiena”. Me dinjitet, profesionalizëm dhe një këmbëngulje të rrallë, ai ka përballuar presionet e pushteteve të ndryshme, duke mbrojtur stabilitetin e kompanisë dhe duke ruajtur partneritetin publiko – privat me përkushtim të jashtëzakonshëm.

Edhe pse nuk është gjilanas, Ramaj u bë shembull i një kuadri që punon në interes të kompanisë dhe komunitetit, duke sakrifikuar shpesh edhe qetësinë dhe jetën e tij personale, vetëm për të mbrojtur marrëdhëniet me partnerët austriakë. Njeri me integritet të padiskutueshëm, ai solli në Kosovë logjikën e punës evropiane, nderin, përpikmërinë, korrektësinë dhe përgjegjësinë publike.

Proceset e montuara gjyqësore, seancat e pafundme, përpjekjet për ta njollosur dhe sfidat që i janë servirur gjatë viteve përbëjnë një kapitull të dhimbshëm në historinë e tij profesionale.

Megjithatë, Ramaj nuk u thye. Përballë kërcënimeve, shantazheve kriminale dhe presioneve të grupeve të nëntokës, ai qëndroi i vetëm, por i paepur. Mbështeti drejtësinë, besoi në punën e tij të ndershme dhe veproi me maturi, duke e ruajtur kompaninë nga çdo tentim destabilizimi.

“Dëshiroj të veçoj vetëm momentet e mira, sepse në fund të fundit më e rëndësishmja është kompania, jo përjetimet e mia nëpër salla gjyqi. Pas gjithë atyre sfidave, jemi në një rrugë të mirë si kompani, duke ruajtur partneritetin me Komunën e Gjilanit. Kam punuar me ndërgjegje të lartë sepse vij nga një vend ku respektohet puna, jo llafet e kota”, është shprehur Ramaj.

Si drejtues i “Eco – Higjiena”, ai kishte planifikuar shumë projekte dhe investime të përbashkëta me partnerët ndërkombëtarë. Pengesat e ndryshme shpesh kanë dëmtuar dinamikën e zhvillimit, por nuk kanë mundur ta shkatërrojnë partneritetin e ndërtuar me mund e profesionalizëm.

Sot, “Eco – Higjiena” mbetet një kompani që ofron shërbime cilësore dhe profesionale, pa ndërprerje, në çdo stinë e në çdo ditë të vitit.

Falë punës së palodhur dhe vizionit të Senad Ramajt, kjo kompani është shndërruar në një model funksional të shërbimeve komunale, të ngritura mbi standarde evropiane. /rajonipress/