Selmani rikthehet nga lëndimi i frikshëm, në prag të ndeshjeve të Kosovës

Astrit Selmani luajti 80 minuta në fitoren e Hammarbay 3:2 kundër Orebro, pasi mungoi rreth tri javë pas një lëndimi të frikshëm në kokë.

Sulmuesi i Kombëtares së Kosovës Selmani e pësoi një tronditje nga përplasja kokë me kokë me kundërshtarin në një ndeshje të Hammarby kundër Ostersunds në ligën elitare suedeze më 24 tetor, raporton Gazeta Express.

Ai i kishte humbur ndjenjat për disa çaste dhe ishte dërguar në spital urgjentisht ku e kishte qepur vetullën e çarë.

Por pas ekzaminimeve mjekësorë dhe disa ditëve pushimi, Selmani i nisi ushtrimet javën e kaluar dhe këtë të diele luajti 80 minuta në fitoren e skuadrës së tij në Allsvenskan.

Selmani i ka bërë 24 paraqitje në ligë për Hammarby deri tani këtë sezon, duke kontribuar me katër gola dhe gjashtë asiste.

Selmani – i cili debutoi për Kosovën në humbjen kundër Suedisë në një ndeshje kualifikuese për Kupën e Botës 2022 në shtator – është ftuar për ndeshjet e fundit të Kosovës këtë vit.

Kosova, e cila do të udhëhiqet nga trajneri i përkohshëm Primoz Gliha pas shkarkimit të Bernard Challandes, përballet me Jordaninë në një ndeshje miqësore të mërkurën më 10 nëntor.

Verdhekaltrit do ta mbyllin një fushatë zhgënjyese për Kupën e Botës 2022 kundër Greqisë në Athinë, të dielën më 14 nëntor.

Ai luajti 20 minuta në humbjen e Kosovës kundër Suedisë dhe katër minuta në humbjen kundër Gjeorgjisë dhe është ende në kërkim të golit të parë për kombëtaren. /Gazeta Express/