Selimi: Dosjet “Pronto” e deshmojnë se nuk ka shtet ligjor

Deputeti Rexhep Selimi, nga subjekti më i madh politik opozitar ‘Vetëvendosje’, tha se kjo formë e tanishme e funksionimit të drejtësisë në raport me politikën dhe anasjelltas, asnjëherë nuk do të mundë të jetë në funksion të ndërtimit dhe fuqizimit të shtetit ligjor.

“Këtë më së miri e dëshmon vazhdimi i serialeve të dosjes “Pronto”. Nuk mund të preken njerëzit e zhytur në krim dhe korrupsion, as ata të aferës ‘Pronto’, nga një drejtësi të cilën ata vetë e kanë kontrolluar dhe e kontrollojnë në vazhdimësi.

Pra, ata tani nuk mundë të gjykohen nga fryti i tyre, sepse tek e fundit ky sistem i tanishëm i drejtësisë është fryt ai atyre që edhe e kanë ndërtuar si sistem të mbrapsht edhe i kanë krijuar mekanizmat që të vazhdojnë ta kontrollojnë. Për të pasur një sistem në funksion të ndërtimit serioz të shtetit, duhet të ndodhë një ndryshim i madh, duhet të ndodhë përmbysja e atyre që e kanë kapur drejtësinë, në mënyrë që drejtësia të çlirohet”, është shprehur Selimi.

Ai shton tutje se kjo drejtësi është e okupuar dhe nuk është e lirë. “Në këtë mënyrë i bije që tash për tash nuk ka drejtësi në këtë vend”, u shpreh Selimi për “Kosova Sot”.

(Kosova Sot)