Ish-futbollisti, trajneri e pedagogu, Selim Muja, karrierës së tij brilante kudo që u paraqitë i dha fund me daljen e tij në pension në vitin 2018, duke lënë gjurmë të pashlyera si tek futbollistët poashtu tek nxënësit e tij e kolegët.
Selim Muja u lind në vitin 1953 në fshatin Hogosht të Kamenicës.
I dashuruar pas futbollit, Muja me sukses të lart përfundon Shkollën e Lartë të Kulturës Fizike, duke kontribuar një jetë të tërë për të mirën e futbollit e edukimin e shumë brezave të cilët i përcolli gjerë në pensionimin e tij.
Karrierën e futbollistit Muja e filloi në vendlindje duke djersitur fanellën e KF Kika si mesfushor, plot pesë vite që nga themelimi i këtij klubi në vitin 1974.
“Ishim të rinjë, kisha rreth 21 vjeç, kishim rini të shëndoshë në fshat, kishim talent në shumë sporte por u përqendruam në futboll dhe formuam KF Kika, me shumë shokë të cilët bartnim barrën e klubit, por edhe shumë intelektualë të fshatit dhanë kontribut të madh për formimin e klubit, ato janë momente tejet të bukura për çdo qytetarë të Hogoshtit dhe ishim krenarë që mbronim ngjyrat e klubit”, kujton Muja.
Selim Muja asnjëherë nuk u ndal për të mirën e sportit për të avancuar lojën e futbollit, ai merr licencën B të trajnerit duke u bërë trajner i KF Kika në vitin 1992 në kohërat kur pushteti serb kishte larguar nga fusha futbollistët shqiptarë – në atë vit KF Kika shpallet nën-kampion i Kosovës.
Aspiratat e trajnerit Selim Muja nuk ndaleshin në asnjë moment. Në vitin 1995 me themelimin e KF Gjilani’95, Selimi inkuadrohet në këtë skuadër duke qenë trajneri i parë në futbollin e Kosovës që punonte me kategori të reja, ndërsa në vitin 2000 si ndihmës-trajner në skuadrën e pare, arrinë të fiton Super Kupën e Kosovës.
“Ishin këto momente tejet të mira të karrierës sime, në një konkurrencë të jashtëzakonshme me Kikën u shpallëm nënkampion, ndërsa me KF Gjilanin’95 arritëm të marrim Superkupën e parë në futbollin e Kosovës. Ato ishin vite tejet të vështira por dashuria ndaj futbollit i mposhti të gjitha dhe jam shumë i lumtur që isha pjesë e këtyre sukseseve”.
Selim Muja për 13 vite ishte trajner i grupmoshave të reja në shkollën e futbollit KF Gjilani, duke dhënë një kontribut të madh nga viti 2000-2013, poashtu nga viti 2013 deri në 2018 formoi Shkollën e pavarur “Shkëndija”, duke zbuluar shumë talent të futbollit.
“Është vështirë të punosh me kategori të reja, duhet t’ju mësosh ABC-në e futbollit, por jam shumë i nderuar që kam pasur rastin të kem shumë futbollist të cilët më vonë kanë bartur fanellat në klube të ndryshme të Kosovës, e klubeve Evropiane”.
Pedagogu Selim Muja që nga viti 1977 merr ditarin në dorë dhe plot 41 vite dha më të mirën e tij tek nxënësit e tij në lëndën e Kulturës Fizike.
Karrierën e pedagogut e filloi në Kamenicë duke vazhduar në Dobërqan (Miresh), ndërsa në vitin 1990 i bashkëngjitet shkollës fillore “Selami Hallaqi” në Gjilan.
“Të punosh me nxënës është kënaqësi shpirtërore, e falënderoj zotin që më ka dhënë mundësin që të punoj me nxënës, ata ishin dhe do të mbesin në zemrën time tërë jetën, personalisht i falënderohem çdo nxënësi e kolegëve për mbështetjen të cilën e kam pasur nga ata. Jam shumë i nderuar edhe sot kur takojë shumë nxënës e sportistë të cilët më përshëndesin e më respektojnë, kjo për mua është pasuria më e madhe në jetë”, shprehet i emocionuar Muja.
Pedagogu Muja arriti me shumë suksese të organizon aktivitete sportive me nxënësit si në gara komunale, shtetërore e ndërkombëtare.
Njëra ndër sukseset e shumta ishte pjesëmarrja në kampionatin botëror në futsall me skuadrën e shkollës fillore “Selami Hallaqi”, në vitin 2014 në qytetin e Italisë në Cagliari.
Fshati Hogosht, qyteti i Kamenicës e Gjilanit, KF Gjilani e shkolla fillore “Selami Hallaqi”, duhet të mburren që në mesin e tyre kanë pasur një njeri me tipare sportive edukative siç është Selim Muja, i cili sot jeton me familjen e tij, me nipër e mbesa, ndërsa djali i tij ish-futbollisti i mirënjohur e tani trajner Premton Muja me plot sukses e krenari po udhëton në rrugëtimin e prindit të tij./rajonipress/
