Selami Zylfiu nderohet nga Ministria për kontribut të jashtëzakonshëm në shërbimin civil

Kamenicë – Selami Zylfiu, ushtrues detyre i Udhëheqësit për Buxhet dhe Financa dhe njëherësh zyrtar certifikues në Drejtorinë për Buxhet dhe Financa të Komunës së Kamenicës, është vlerësuar me mirënjohje nga Ministria e Digjitalizimit dhe Administratës Publike për kontributin, profesionalizmin dhe përkushtimin e treguar ndër vite në shërbimin civil të Republikës së Kosovës.

Mirënjohja iu nda në një ceremoni solemne të organizuar në Prishtinë me rastin e Ditës Ndërkombëtare të Shërbimit Publik, ku u nderuan zyrtarë të dalluar për punën dhe angazhimin e tyre në forcimin e administratës publike dhe ofrimin e shërbimeve cilësore për qytetarët.

Çmimin për Zylfiun e dorëzoi ministri i Digjitalizimit dhe Administratës Publike, Lulëzon Jagxhiu, ndërsa në këtë ngjarje mori pjesë edhe Albin Kurti, i cili vlerësoi lart rolin e shërbyesve civilë në ndërtimin e institucioneve të besueshme dhe në rritjen e besimit të qytetarëve ndaj administratës publike.

Me një karrierë të gjatë dhe të suksesshme në sektorin e financave publike, Selami Zylfiu njihet si një nga profesionistët më të përkushtuar në administratën komunale të Kamenicës. Puna e tij është karakterizuar nga përgjegjshmëria, integriteti profesional dhe menaxhimi efikas i proceseve financiare, duke kontribuar në funksionimin transparent dhe të qëndrueshëm të institucioneve lokale.

Ky vlerësim konsiderohet një dëshmi e punës së palodhshme dhe e standardeve të larta profesionale që Zylfiu ka kultivuar ndër vite, duke u bërë shembull i një shërbyesi civil që me përkushtim dhe kompetencë i shërben interesit publik dhe zhvillimit institucional./rajonipress/