Sejdiu, nuk ishte vetëm kundër Mustafës

Votën për shef Qeverie, Isa Mustafa nuk e ka marrë as nga Naim Jerliu. Nominimi i kreut të LDK-së Isa Mustafa për kryeministër, në mbledhjen e së hënës nuk ka shkuar aq mirë, siç janë munduar ta transmetojnë në publik zyrtarët e LDK-së.

Në fakt, Tribuna ka mësuar se në mbledhjen e Këshillit të përgjithshëm të kësaj partie, nuk ka qenë vetëm kryetari i nderit të partisë, Fatmir Sejdiu, ai që ka votuar kundër nominimit të Mustafës për kryeministër.

Votën për shef Qeverie, Mustafa nuk e ka marrë as nga Naim Jerliu. Këtë e ka konfirmuar vetë Jerliu, në një prononcim të shkurtër për gazetën.

“Nuk kam votuar për kandidaturën e Isa Mustafës”, ka thënë ai, duke nxjerrë në pah edhe një parregullsi tjetër që e ka përcjellë Këshillin e fundit të partisë. “E vërteta është që në atë mbledhje ka pasur edhe anëtarë që nuk kanë të drejtë vote. Nuk e di pse nuk i kanë numëruar mirë votat, por kjo është e vërteta. Po ashtu, ka pasur edhe anëtarë tjerë të Këshillit që nuk kanë qenë në mbledhje”, ka thënë Jerliu.(Tribuna).