Së shpejti hapet Qendra për Arte Bashkëkohore në Gjilan

Gjilan- Organizata multi-artistike “Varg e Vi” nga Gjilani e cila kryesisht merret me aktivitete kulturore, performanca, ekspozita,wëorkshope apo trajnime dhe edukim mbi artet bashkëkohore këtyre ditëve po bën përgatitjet për hapjen e Qendrës për Arte Bashkëkohore në Gjilan.

Lokalet e Qendrës për Arte Bashkëkohore në Gjilan të premten i ka vizituar Veton Nevzadi, drejtor për Rini, Kulturë dhe Sport i Komunës së Gjilanit, i cili me këtë rast i inkurajoi artistët për punën e mirë që po bëjnë duke i ripërsëritur të pranishmëve përkushtimin e kryetarit të komunës Qemajl Mustafa dhe të drejtorisë që ai udhëheqë për të përkrahur secilën iniciativë e cila do të promovonte kulturën dhe artin në Gjilan.

Jeton Muja, kryetar i organizatës multi-artistike “Varg e Vi” nga Gjilani me këtë rast falënderoi institucionet komunale për përkujdesjen duke përshkruar në mënyrë të detajuar natyrën e aktiviteteve të cilat do t’i zhvillojë kjo qendër.

Muja theksoi që qëllimi kryesor dhe i vetëm i Qendrës mbetet zhvillimi i artit bashkëkohorë në komunën e Gjilanit, Kosovë dhe më gjerë, duke nxitur artistët e rinj dhe të të gjitha brezave, të shfaqin kreativitetin e tyre origjinal dhe format e reja të artit bashkëkohor.

Hapja solemne e Qendrës për Arte Bashkëkohore në Gjilan pritet të bëhet në kuadër të aktiviteteve të cilat po shënojnë 100 vjetorin e Pavarësisë në të gjitha trojet shqiptare./rajonipress/