SBASHK-u në ‘luftë’ me MASHT-in

Ministri i Arsimit, Shkencës dhe Teknologjisë (MASHT-i) dhe Sindikata e Bashkuar e Arsimit, Shkencës dhe Kulturës (SBASHK-u) kohëve të fundit nuk janë duke komunikuar mes vete. Ky moskomunikim ka ardhur pas vendimit të marrë nga Ministria e Arsimit për kompensimin e orëve të humbura për shkak të grevës. Situata e krijuar në arsim është konsideruar e dëmshme për nxënësit, shkruan Gazeta “Zëri”.

Vendimi i marrë në fund të muajit shkurt të këtij viti nga Ministria e Arsimit, që mësimdhënësit t’i kompensojnë orët e humbura për shkak të grevës, nuk i ka pëlqyer SBASHK-ut, i cili ka paralajmëruar një grevë të re.

Kryetari i SBASHK-ut Rrahman Jasharaj ka kërkuar nga ministri i Arsimit Shyqiri Bytyqi që t’i ulë tensionet dhe ta tërheqë vendimin e tij për kompensim të orëve të humbura. Ai ka thënë për “Zërin” se mësimdhënësit duhet të vendosin vetë nëse do ta kompensojnë mësimin e humbur.

“Komunikimi me MASHT-in ka kohë që nuk zhvillohet. Ne i qëndrojmë vendimit të Këshillit Drejtues. Ne kemi paralajmëruar grevë nëse vazhdojnë me presione. E mira do të ishte që ministri t’i ulë tensionet, ta tërheqë vendimin që e ka marrë dhe pastaj ne t’ua lëmë vetë mësimdhënësve që ata nga aspekti moral të shohin se a do të duhet ndonjë ditë për ta plotësuar mësimin, në mënyrë që nxënësit t’i arrijnë njohuritë e mjaftueshme për këtë vit shkollor”, ka thënë ai. Jasharaj ka thënë se Ligji për Greva nuk i obligon ata t’i kompensojnë orët e humbura, derisa ka bërë të ditur se tashmë kanë bërë edhe padi ndaj vendimit të ministrit Bytyqi.