SBASHK-u kërcënon Qeverinë

Sindikata e Bashkuar e Arsimit, Shkencës dhe Kulturës (SBASHK), të mërkurën, publikisht iu është drejtuar institucioneve me kërkesën që t’i realizojnë obligimet e tyre ndaj të punësuarve në arsim, në të kundërtën kjo Sindikatë ka paralajmëruar se gjysmëvjetori i dytë do të nisë me veprime sindikale.

“SBASHK-u i drejtohet publikisht edhe atyre që kanë gjetur kohë për të zhvilluar dialog konstruktiv me ne, por edhe atyre që nuk e kishin këtë vullnet, siç janë ministri Arban Abrashi dhe ministri Avdullah Hoti, që të kenë kujdes dhe të parashohin mjete buxhetore për realizimin e kërkesave të drejta nga Kontrata Kolektive dhe që të planifikojnë mjete për përmirësimin e lëshimit të rëndë lidhur me pensionet e të punësuarve në arsim, ngase atyre, edhe pse ligjërisht u janë njohur si kontributdhënëse vitet 90 – 99, në praktikë e që nga prilli i këtij viti të pensionuarit nga sektori i arsimit nuk e gëzojnë pensionin 140 euro, por atë prej 75 eurosh, që në të vërtetë është ndihmë sociale”, thuhet në komunikatën e kësaj Sindikate.

SBASHK-u i është drejtuar Qeverisë edhe për Projektligjin për Statutin e Punëtorëve të Arsimit Shqip të Republikës së Kosovës nga viti shkollor 1990/91 deri në vitin shkollor 1998/99’ me kërkesën që të finalizohet dhe të dërgohet që tani në Parlament.

“SBASHK-u publikisht u drejtohet institucioneve me deklaratën konkrete e të mbështetur nga mijëra të punësuar në arsimin e Kosovës se institucionet qendrore e lokale ose do të realizojnë obligimet e tyre ndaj të punësuarve në arsim, ose gjysmëvjetori i dytë do të nisë me veprime sindikale, që do të përshkallëzohen dhe SBASHK-u për këtë nuk do të jetë fajtor”, thuhet në komunikatë./zeri/