Samet Rexhepi: “Nuk jam mashtrues as uzurpator, jam blerës legal i pronës private”

Gjilan – Samet Rexhepi, i cili prej kohësh është vënë në qendër të akuzave për uzurpim prone nga paditësit Adem Halabaku dhe Hysen Hasimi, ka reaguar publikisht duke sqaruar gjithë rrjedhën e procesit gjyqësor që po zvarritet prej vitesh. Ai thotë se akuzat ndaj tij janë të pabaza dhe se prona është blerë në mënyrë të ligjshme, me mjete financiare të fituara me mund e sakrificë si gurbetqar.

“Nuk jam mashtrues, as uzurpator. Jam blerësi legal i një parcele prej 22 ari, të cilën e kam paguar 170 mijë franga, para të fituara me djersë jashtë vendit. Edhe unë jam lodhur me gjykatat, të cilat duhet të jenë efikase e të mos i mbajnë palët pezull kaq gjatë,” deklaron Rexhepi pwr rajonipress.

Ai thekson se reagimi i tij publik vjen si përgjigje ndaj akuzave që po e ndjekin prej vitesh për një pronë në Pozheran, çështje që, sipas tij, nuk po gjen ende epilog të qartë në Gjykatën e Vitisë.

Rexhepi mohon kategorikisht se ka ushtruar dhunë ndaj kujtdo. Përkundrazi, ai thotë se ka qenë vetë viktimë e sulmeve.

“Jam blerës legal i një prone, pronar i së cilës është një shtetas serb, ndërsa të gjitha dokumentet i kam të verifikuara nga gjykata dhe hetuesia e Gjilanit. Gjykata e Vitisë dhe ajo e Apelit e kanë përfunduar rastin. Tani jam i paditur vetëm për çështjen e përparësisë në blerje, dhe besoj se drejtësia do të triumfojë edhe në këtë fazë, edhe pse jemi lodhur me seanca të pafund,” tha ai.

Sipas Rexhepit, është e panevojshme që palët të vazhdojnë me ankesa e padi të reja, pasi siç shprehet ai, dokumentacioni është i saktë, i ligjshëm dhe pronësia është e qartë./rajonipress/