Salustro paralajmëron aktakuzë kundër “Grupit të Drenicës”

Prokurori i EULEX – it Maruizio Salustro ka kërkuar nga Gjykata Themelore në Mitrovicë vazhdimin e paraburgimit edhe për dy muaj, deri më 23 dhjetor 2013, ndaj Sylejman Selimit – ish komandant i Shtabit të Përgjithshëm të UÇK-së dhe 6 ish bashkëluftëtarëve të tij.

Avokati Tomë Gashi ka thënë për Kosovapress se e konsideron jo ligjore, fyese, pretendimet e prokurorit të EULEX-it, se Selimi dhe të tjerët që luftuan për çlirimin e Kosovës do të ikin nga Kosova, për t`u mos u përballur me një gjykim të ardhshëm.

Sipas avokatit Gashi, prokurori pretendon se mund të ketë ndikim tek dëshmitarët në këtë çështje dhe në të njëjtën kohë, prokurori ka paralajmëruar ngritje të aktakuzës për disa ditë.

Gashi ka thënë se nëse është kështu, atëherë si mund të ndikohet tek dëshmitaret të cilët paskan dhënë deklarata gjatë hetimeve.

“Ne si avokat do të paraqesim kundërshtimet tona dhe mbetet që gjykata të vendos. Duhet thënë se paraburgimi është duke u përdorur si dënim, e jo si masë, thuajse në të gjitha rastet e hapura kundër pjesëtarëve të UÇK-së”, ka thënë ai./Telegrafi/