Sali Berisha: Këta që pretendojnë për kombin kosovar, janë me gjak titist jugosllav

Ish-kryeministri i Shqipërisë, Sali Berisha, në një intervistë speciale dhënë RTV Dukagjinit, ka folur për shumë çështje, ndër të cilat edhe për debatin “kosovarë” apo shqiptarë.

Berisha, ata që e ndjejnë vetën se janë të kombësisë kosovare, nuk ka hezituar t’i quajë jo më pak se gjak titist-jugosllav.

“Është një marrëzi, një trashëgimi e kohës së Titos. Pse e them unë këtë? Tito dhe grupi kroato-slloven i udhëheqjes politike jugosllave, ishin magjistarë për të nxjerrë nga librat dhe doktrinat e shkuara të gjitha llojet e koncepteve në ish-Jugosllavi, për të krijuar nocione, fiktivitete, falsitete. Mbajti nja 18 vjet Xhemal Bjediqin derisa i futi një bombë në aeroplan, vetëm e vetëm se i duhej kombi mysliman. Tani, këta që pretendojnë për komb kosovar janë fund e krye gjak titist, jugosllav. Kudo që të jenë”, tha ai.

Madje, Berisha foli edhe për vizitat e kryeministrit Edi Ramës në Beograd, duke këmbëngulur se nuk mund të ketë komb kosovar dhe se kjo është asgjë më shumë se përpjekje e Don-Kishotëve me mullinjtë e erës.

“Nuk mund të marr unë etalon për çështjen kombëtare, as Edi Ramën, as ata që reagojnë. Se, mos harro se edhe në reagimet e këtyre që shkojnë në këtë drejtim ka dejza të Ramës. Si mund të flasësh për komb kosovar, kur dihej që kjo është një përpjekje e vjetër e Titos. Këta çfarë bëjnë? Këta nxjerrin nga sirtarët teori të tilla të ndryshkura, të pavlerë dhe e bëjnë absolutisht e tërësisht për konfortabilitet personal, për të mos thënë për qëllime antikombëtare. Ajo s’mund të krijohet. Ajo është një përpjekje e Don Kishotëve me mullinjtë e erës. S’mund të krijohet komb kosovar”, tha ai. /Telegrafi/