Sabit Rrustemi nderohet me çmimin vjetor për librin më të mirë të poezisë

Gjilan – Në një ceremoni të organizuar sot, në ambientet e Ministrisë për Kulturë, Rini dhe Sport në Prishtinë, në vigjilje të 6 vjetorit të njohjes ndërkombëtare të pavarësisë së Republikës së Kosovës, janë dhënë Çmimet vjetore për letërsi, vlerësuar nga një Juri Profesionale në krye me Osman Gashin.

Në mesin e të nderuarve me Çmime për letërsi, për veprat e botuara gjatë vitit 2013, është edhe shkrimtari ynë nga Zhegra, Sabit Rrustemi.

Vepra e tij “Murale shpirti”, botuar nga Shtëpia Botuese ROZAFA, është shpallur si vepra më e mirë në poezi, për vitin 2013.

Laureatëve të sivjem, Çmimet për letërsi, ua uroi vetë ministri, Memli Krasniqi, i cili i përgëzoi fituesit duke ju dëshiruar krijimtari të begatë me zotimin se MKRS-ja do ndihmojë letërsinë si dhe brenda mundësive buxhetore, edhe vetë krijuesit, veprat e të cilëve sjellin prurje të reja në letërsi dhe vetë kulturën shqiptare./rajonipress/