Sa më shumë të shtyhen zgjedhjet, aq më keq për Kosovën

Zyrtari i lartë i Aleancës Kosova e Re (AKR), Agim Bahtiri, është i mendimit që Kosova të shkojë sa më parë në zgjedhje të reja.

Në këtë intervistë dhënë për gazetën “Epoka e re”, ai ka thënë se sa më shumë të shtyhen zgjedhjet e parakohshme më keq do të jetë për Kosovën. Bahtiri ka theksuar se kjo qeveri është duke e çuar në humnerë shtetin. Sipas tij, qeveria aktuale duhet të shkojë në shtëpi dhe të fillojnë bisedimet për kohën e mbajtjes së zgjedhjeve. “Tani është koha të pyetet populli se kënd e përkrah. Mendoj se zgjedhjet në Drenas kanë dhënë një sinjal pozitiv të demokracisë dhe të ndryshimit të kësaj qeverie”, është shprehur ai. Bahtiri është shprehur i bindur në suksesin e kësaj partie në zgjedhjet e ardhshme parlamentare. Ai ka thënë se asnjëherë më parë AKR-ja nuk ka pasur përkrahje më të madhe tek qytetarët.

Sa iu përket zgjedhjeve lokale për vitin e ardhshëm, ai ka thënë se, nëse rikandidon për kryetar të Mitrovicës, do t’i fitojë zgjedhjet pa balotazh. “Ne e kemi presidentin e AKR-së dhe organet e partisë që vendosin për kandidat për kryetar të komunave. Do të shohim. Në qoftë se vendoset që unë të jem sërish kandidat për kryetar të Mitrovicës, jam i bindur se këto zgjedhje do t’i fitoj rreth 63 për qind”, ka thënë Bahtiri.