“Rruga”, zgjidhja e vetme për opozitën

Me përplasje e debate të ashpra është përshkuar mbledhja e parë e Kryesisë së Kuvendit për këtë sesion vjeshtor që ka çuar deri te braktisja e punimeve nga tri partitë politike opozitare pikërisht për shkak të marrëveshjeve që ka arritur kryeministri Isa Mustafa në lidhje me Asociacionin e Komunave me Shumicë Serbe.

Ndërkohë, kryesia e Kuvendit pa praninë e spektrit opozitar ka vendosur që seanca e parë për këtë sezon të mbahet këtë të enjte (17 shtator), ku shefi i Qeverisë “Mustafa” do të raportojë para ligjvënësve lidhur me marrëveshjet e fundit të nënshkruara në Bruksel në mes Kosovës dhe Serbisë, në kuadër të dialogut për normalizimin e marrëdhënieve mes këtyre dy vendeve.

Por, në lidhje me sjelljet e tre zyrtarëve opozitarë të cilët braktisën punimet e Kryesisë është shfaqur kritikë kreu i Kuvendit të Kosovës, Kadri Veseli, i cili tha se sjellja e tyre ishte joserioze./zeri/