Rruga zgjerohet në kohë të papërshtatshme

Ndonëse e konsiderojnë të domosdoshëm zgjerimin e rrugës që lidh Prishtinën me Fushë Kosovën, qytetarët kritikojnë Ministrinë e Infrastrukturës se nuk ka gjetur kohën më të përshtatshme për kryerjen e punimeve.

Edhe pse punimet në zgjerimin e rrugës nacionale Prishtinë – Fushë Kosovë kanë krijuar kolona të gjata, sidomos në hyrje të Prishtinës ku komunikacioni është vështirësuar dukshëm, qytetarët vlerësojnë se zgjerimi i kësaj rruge ka qenë i domosdoshëm. Mirëpo, ata hedhin kritika ndaj Ministrisë së Infrastrukturës pasi mendojnë se këta zyrtarë nuk e kanë zgjedhur kohën më të përshtatshme për t’i filluar punimet në zgjerimin e rrugëve.

Projekti për zgjerimin e kësaj rruge kap vlerën prej mbi 633 mijë eurosh, ku gjatësia e këtij segmenti do të jetë rreth 3 kilometra nga hyrja e Prishtinës deri tek rrethrrotullimi në Fushë Kosovë.

Rruga, e cila deri më tani ka pasur dy korsi, pas kryerjes së punimeve do t’i ketë tri korsi. Por Saranda Jusufi, zëdhënëse në Ministrinë e Infrastrukturës, ka thënë se punimet për ndërtimin dhe rindërtimin e rrugëve fillojnë në muajin prill dhe më pas projektet zhvillohen në bazë të planit./zeri/