Rruga Pograxhë – Llovcë projekt dobiprurës për Gjilanin

Gjilan – Kompania nga Gjilani “Zuka Comerc” është fituese e tenderit në vlerë të 450 mijë eurove për asfaltimin e rrugës Pograxhë – Llovcë me një gjatësi prej 3. 5 km. Fadil Osmani menaxher në zyrën e projekteve tha se në bazë të raportit teknik rruga Pograxhë – Llovcë është arterie e cila lidhë komunikimin në mes të fshatrave dhe rrugëve në relacionin Gjilan – Pograxhë – Dobrosin dhe rrugën tjetër regjionale Gjilan – Preshevë , një lidhje kjo e natyrshme në të gjitha aspektet për popullatën e kësaj ane transmeton rajonipress.

Të gjitha procedurat e tenderit për asfaltimin e rrugës Pograxhë – Llovcë e gjatë 3.5 km tashmë kanë përfunduar. Fadil Osmani menaxher në zyrën e projekteve tha për rajonipress se Ministria e Infrastruktures e ka shpallur fitues të tenderit kompaninë nga Gjilani “Zuka Comerc”. Kostoja e kësaj rruge arrin në 450 mijë euro saktësoj Osmani.

Osmani tha se ky projekt është shumë i rëndësishëm dhe i dobishëm për banorët e mbetur atje. “Me ndërtimin e kësaj rruge problemet dhe vështirësitë që ka popullata lokale e kësaj treve për komunikim me qendrën komunale të Gjilanit dhe qendrat tjera si Prishtina e Ferizaji në aspektin e qarkullimit të komunikacionit do të evitoheshin”.

Osmani tha se në bazë të raportit teknik rruga Pograxhë – Llovcë është arterie e cila lidhë komunikimin në mes të fshatrave dhe rrugëve në relacionin Gjilan – Pograxhë – Dobrosin dhe rrugën tjetër regjionale Gjilan – Preshevë , një lidhje kjo e natyrshme në të gjitha aspektet për popullatën e kësaj ane.

Sipas Osmanit kjo rrugë ka qenë prioritet i kryetarit Qemajl Mustafa i cili është angazhuar maksimalisht që brezi kufitarë të jetë përfitues i infrastrukturës rrugore. Komuna ka bërë projekte edhe për rrugën e Bilinicës dhe të Kokajve të cilat janë gjithashtu në listën e prioriteteve të kreut komunal tha Osmani.

Lajmi se tani punët mund të nisin në pranverë i ka gëzuar edhe banorët e Llovcës të cilët thonë se rruga e asfaltuar ua ngjallë shpresat dhe kthen edhe optimizmin e banorëve tjerë për të investuar dhe jetuar aty.

Fshati Llovcë dikur (para luftës ) i ka pasur mbi 56 shtëpi të banueshme. Por kushtet e rënda të jetesës dhe rruga e dëmtuar ka detyruar shumë familje që të braktisin fshatin dhe të vendosen në qytet. Aktualisht Llovca i ka 27 shtëpi të banueshme.

Sipas Osmanit në fazën e dytë është paraparë edhe vazhdimi i asfaltimit të rrugës Llovcë – Ranatovc.

Osmani tha se janë paraparë edhe rrugët Pograxhë – Bilinicë dhe Pograxhë – Sllubicë.

Nuhi Nuhiu banor nga Llovca dhe aktivist tha për rajonipress se jemi shumë të gëzuar që më në fund edhe ky fshat kufitarë po përfiton një projekt madhor. “Jam i sigurt se asfaltimi i rrugës do të kthejë shumë banorë për të jetuar dhe punuar tokën. Rruga ka qenë shumë e dëmtuar dhe ka qenë e rëndë të jetohet pa e pasur infrastrukturën rrugore të rregulluar”.

Nuhiu tha se viteve të fundit veç kanë filluar të ndërtohen kampështëpiza dhe shtëpi të reja. “Llovca ka një peizazh që vetëm zoti e ka falur dhe normalisht që ky ambient i mrekullueshëm duhet të shfrytëzohet” tha Nuhiu./rajonipress/