Rritje ekonomike përmes sektorit bankar

Kryeministri i Kosovës, Isa Mustafa, ka thënë se sistemi bankar në Kosovë është mjaft i qëndrueshëm dhe i shëndoshë. Mustafa ka thënë se sipas vlerësimeve të Bankës Qendrore dhe Bankës Botërore ne kemi trende të mira të zhvillimit. I pari i Qeverisë ka thënë se vlerësimet e BQK-së dhe të Bankës Botërore japin indikacione se Kosova ka pasur rritje ekonomike prej 3,5 për qind deri në 3,6 për qind vitin e kaluar. Ai shtoi se presin që këtë vit rritja ekonomike të jetë më e lartë. Kështu ka deklaruar kryeministri Mustafa të enjten gjatë një vizite në BKQ.

“Ne tani kemi arritur që bankat të ofrojnë kredi cilësore për ekonominë dhe në afatet cilësore për ekonomi kemi trende të mira të zhvillimit sepse sipas vlerësimeve të Bankës Qendrore janë si të ato të Bankës Botërore se ne do të kemi një rritje ekonomike për vitin e kaluar ndërmjet 3,5 deri në 3,6 për qind dhe po ashtu një rritje më të madhe ekonomike për vitin e ardhshëm se kemi një trend të mirë të inkasimit të tatimeve dhe qëndrueshmërisë buxhetore”, ka thënë ai.

Sipas tij, BQK-ja po ndihmon vendin dhe Qeverinë përmes një pune të mirë që po e bën, duke koordinuar dhe mbikëqyrur sektorin bankar.

Po ashtu, sipas Mustafës edhe trendi i regjistrimit të firmave të reja dhe investimeve është pozitiv.

Ndërsa Bedri Hamza, guvernator i Bankës Qendrore, ka thënë se sektori bankar në Kosovë është mjaft profitabil.

Ai ka bërë të ditur se në tremujorin e parë të këtij viti ka rritje të kredive, ndërsa sa i përket normave të interesit, sipas tij, gjatë muajit prill ato kanë rënë në 7,4 për qind./zeri/