Rriten vjedhjet në Gjilan, mungesa e ndriçimit publik
Gjilan – Lagjet e mëdha të Gjilanit tash e disa ditë janë nën terrin e plotë të mesjetës. Gjilani nuk i përngjan aspak një qyteti ku zhvillohet jeta normale sepse dominon terri në rrugët e lagjeve kryesore. Komuna nuk ka bërë asnjë përpjekje për ta zgjidhur këtë problem.
Mungesa e ndriçimit publik ka shtuar numrin e vjedhjeve në familjet gjilanase. Pos vjedhjeve është shtuar edhe pasiguria në mungesë të ndriçimit publik.
I dominuar nga terri i mesjetës Gjilanit i ka humbur epiteti i qytetit Evropian, meqë mungojnë gjërat elementare për jetën e rëndomtë të qytetarit.
Hydajeti një 63 vjeçar thotë se 20 vite pas luftës nuk ka ndodhur që të jetoj kështu në terr të plotë. “Tani kjo situatë është bërë e padurueshme dhe qesharake, unë nuk e di a KEDS-i i ka fajet apo komuna, vetëm një e kuptojë se gjendja është bërë e mjerueshme për të jetuar. Kërkojë nga Komuna e Gjilanit që të kthejë në funksion ndriçimin publik sepse po detyrohemi edhe kujdestari natën të bëjmë për të ruajtur pronat tona nga hajnat e natës” thotë ky qytetar.
Edhe, Milazimi një 45 vjeçar thotë se i është sulmuar shtëpia e tij natën nga hajnat.”Fatmirësisht kanë marrë gjësende pa vlerë, ndërsa i kanë dëmtuar orenditë gjatë vandalizmit të shprehur” shton ky qytetar.
Është e habitshme heshtja dhe komoditeti i zyrtarëve komunal karshi këtij problemi, madje nuk ka asnjë reagim dhe asnjë sqarim rreth kësaj teme e cila pothuajse debatohet në çdo familje gjilanase./rajonipress/