Rrezik është kriza ekonomike, jo terrorizmi

Qendra e Kosovës për Studime të Sigurisë (QKSS) ka realizuar një hulumtim për perceptimin e qytetarëve në raport me zhvillimet më të rëndësishme në vend. Hulumtimi ka konstatuar se nuk ka rrezikim të sigurisë nga jashtë, ndërsa është dëshmuar se problemet ekonomike dhe sociale i shqetësojnë më së shumti qytetarët e Kosovës.

Hulumtimi ka treguar se është ulur shkalla e besueshmërisë së qytetarëve të nacionalitetit shqiptarë dhe serb për punën e EULEX-it. Është konstatuar se qytetarët shqiptarë nuk kanë shumë informacione për Agjencinë e Kosovës për Inteligjencë.

Hulumtimi i QKSS-së ka dëshmuar se qytetarët besojnë se siguria është më e madhe në lagjen e tyre, sesa shkalla e përgjithshme e sigurisë. Është konstatuar se qytetarët në zonat urbane ndihen më të pasigurt. Prishtina dhe Peja janë cilësuar si qytetet më pasigurta, ndërsa Skenderaj qyteti më i sigurt.

Perceptimi i qytetarëve ka qenë se rreziku më i madh që mund të vijë nga jashtë është kriza ekonomike, ndërsa pothuajse nuk shprehet ndjenja e rrezikut prej terrorizmit. Gjithashtu, shkalla e rrezikut nga Serbia është ulur në shkallën 10 %.

Hulumtimi i QKSS-së ka konstatuar se qytetarët besojnë se korrupsioni në organet qeveritare është në shkallën 87 %, në komuna 71 %, në sistemin juridik dhe shëndetësor 79 %, në polici 61 %, në arsim 54 %, ndërsa shkalla më e ulët është në FSK me vetëm 9 %.

Gjithashtu, shkalla e besimit të qytetarëve është më e madhe për FSK-në në 78 % dhe për institucionet fetare, 60 %. /Telegrafi/