Rreth 30 mijë ish punëtorë presin Bordin e AKP-së

Rreth 30 mijë ish punëtorë të ndërmarrjeve shoqërore të privatizuara kanë mbetur peng të Bordit të Agjencisë Kosovare të Privatizimit.

Mungesa e funksionimit të këtij Bordi që nga muaji gusht i vitit të kaluar, ka bërë që ish punëtorët e këtyre ndërmarrjeve të mos mund të gëzojnë drejtën e marrjes së 20 për qindëshit nga shitja e ndërmarrjeve.

Përveç kësaj AKP nuk ka mund të marrë vendime as për shpërndarjen e mjeteve nga likuidimi i ndërmarrjeve.

Kreu i Bashkimit të Sindikatës të Pavarura të Kosovës, Haxhi Arifi për Tribuna Channel, ka thënë se mos implementimi i bordit të AKP-së ka dëmtuar në mas të madhe punëtorët.

Në AKP thonë se i kanë njoftuar me kohë institucionet vendimmarrëse për kompletimin e Bordit dhe të njëjtave u kanë bërë thirrje që në afatin sa më të shpejtë të mundshëm të bëhen emërimet e drejtorëve të Bordit në mënyrë që të ushtrojnë mandatin e plotë ligjor.

Kryeministri i Kosovës, Isa Mustafa ka premtuar se Bordi i AKP-së, do të kompletohet gjatë muajit prill.

Që nga muaji i kaluar Bordi i AKP-së ka mbetur pa asnjë anëtar, pasi tre anëtarëve të vetëm më 20 shkurt u ka skaduar mandati.