Rrëfimi i Sadikut

Tifozët, pasaporta bullgare, ecuria në Superligën zvicerane, e ardhmja dhe skuadra e ëndrrave. Armando Sadiku tregon gjithçka.

Sulmuesi i Kombëtares shqiptare, Armando Sadiku ka falënderuar tifozët kuqezi për mbështetjen e madhe që i japin. Ai ka folur edhe për ecurinë në Zvicër, pasaportën bullgare, të ardhmen e tij dhe skuadrën ku ëndërron të luaj.

“Tifozët janë zemra jonë, lojtari ynë i 12-të. Unë personalisht, sa herë që vesh fanellën e Kombëtares, kur autobusi futet në stadium, ose kur i sheh të gjithë shqiptarët nëpër rrugë, më shpëtojnë lotët nga gëzimi dhe emocionet. Prandaj keqardhja është më shumë për tifozët, ndërsa ne jemi profesionistë dhe nuk duhet të mendojmë se çfarë ndodh jashtë fushe”, ka thënë futbollisti i Luganos për “konica.al”, përcjell albinfo.ch.

Ai po shkëlqen për Luganon, ku në katër ndeshje ka shënuar tre gola. “Është e vërtetë që jam sërish në 11-shen më të mirë të javës. Çdo ditë dhe çdo javë mundohem të jap maksimumin dhe falë Zotit, jam mirë. Për sa i përket pasaportës bullgare, është një lëvizje e imja për të pasur mundësi të luaj në Evropë, në kampionate të tilla, siç është Italia dhe Anglia, që mos kem asnjë lloj problem dhe të jem i gatshëm në çdo moment, nëse do më kërkojnë. Por kjo nuk do të thotë se do ta lë Kombëtaren shqiptare, nuk e kam menduar për asnjë moment”, theksoi futbollisti kuqezi.

Ai ka folur edhe për skuadrën e ëndrrave. “Do të kisha dëshirë të luaja me një ekip të madh. Që kur kam qenë i vogël kam bërë tifo për Interin, në atë kohë luante “Fenomeni” Ronaldo dhe prandaj një ditë ëndërroj të jem sulmues i Interit. Nuk e di sa kjo ëndërr do të më realizohet, megjithatë edhe nëse luaj në një skuadër në Gjermani ose në Angli, do të ishte perfekte për mua”, u shpreh ndër të tjera futbollisti i Kombëtares shqiptare.

http://www.albinfo.ch/rrefimi-i-sadikut/