Rrëfimi emocional i Sabri Fejzullahut për kthimin në Prishtinë: E gjeta shkret

Sot në emisionin “Frontal” në T7, ka qenë i ftuar këngëtari Sabri Fejzullahu, i cili sot është nderuar me çmimin “Çelësi i Kryeqytetit” nga kryetari i Komunës së Prishtinës, Shpend Ahmeti. Fejzullahu në 21 vjetorin e çlirimit të Prishtinës, ka rrëfyer përjetimin e tij për kohën e luftës dhe kthimin në Kosovë.

Ai ka folur edhe për kohën kur ka qëndruar në Strugë bashkë me familjen.

“Në ditën e Bajramit e thirra vëllain, më tregoi që janë të bllokuar të gjithë. Të gjithë kosovarët interesoheshim ku i kemi familjarët. Kur vinte mbrëmja, thoshim o Zot a do të fluturojnë aeroplanët për të bombarduar, o Zot a do të kthehemi”, ka thënë Fejzullahu në Frontal.

Fejzullahu tha se gjatë kohës së luftës kur ishte larg Prishtinës, i mungonte qyteti por edhe njerëzit, për të cilët nuk dinte a ishin gjallë.

“Nga Prishtina më mungonin njerëzit, nuk dija për fatin e askujt. Nuk dinim askush për askënd ku jemi, thosha a do të jemi të lirë athu. Njerëzit tregonin se kanë shkatërruar gjithçka në Prishtinë”, ka thënë ai.

Fejzullahu tha se emocionet e kthimit në atdhe pas përfundimit të luftës janë të papërshkrueshme.

“Prishtina ishte shkret, katastrofë, si çdo qytet. Më e keqja ishte se nuk e dinim si po ndodh me qytetet tjera. Ditën e parë kur kam ardhur në Prishtinë, në hotel Grand kam shku me pi kafe, kanë qenë do djem të rinj me veshje të UÇK’së, ka pasur edhe të huaj e gazetarë. Frikësohesha me hy, nuk e dija a kam të drejtë. Më thanë o axha Sabri, hyr, Kosova është e lirë, nuk ka më vrasës”, ka thënë Fejzullahu në Frontal./GazetaExpress/