Rrahmani me paraqitje të shkëlqyer i ndihmon Napolit ta ruajë kreun në Serie A dhe ecurinë e fitoreve radhazi

Amir Rrahmani i ka ndihmuar Napolit ta mposht 2:1 Fiorentinën duke e shënuar golin e triumfit dhe duke e bërë një pritje vendimtare. Puna e shkëlqyer e kosovarit bën që Napoli ta vazhdojë ecurinë e përkryer të fitoreve radhazi dhe ta ruajë kreun në Serie A.

Kapiteni i Kombëtares së Kosovës Rrahmani e shënoi golin e fitores së Napolit kundër Fiorentinës të dielën në Firencë, i cili ishte i dyti për të këtë sezon në ligën elitare italiane, raporton Gazeta Express.

Në paraqitje e tij të katërt si titullar për skuadrën e Luciano Spallettit, mbrojtësi i lindur në Prishtinë e shënoi golin e dytë personal në Serie A.

27-vjeçari kishte shënuar edhe në fitoren e thellë të Napolit 4:0 kundër Udinesës në paraqitjen e tij të parë të sezonit për napolitanët.Fiorentina e befasoi Napolin duke kaluar në epërsi 1:0 pas vetëm gjysmë ore lojë, kur shënoi Lucas Martinez Quarta.

Hirving Lozano e barazoi rezultatin në minutën e 41-të nga një top i kthyer në zonë nga portieri, i cili e bëri pritje të dyfishtë duke i ndalur penalltinë dhe goditjen me kokë të Lorenzo Insignes njëkohësisht.

Rrahmani shënoi gol të bukur me kokë pas një harkimi të Zielinskit nga një ndërprerje në minutën e 50-të. Rreth 10 minuta para fundit, kosovari e largoi një harkim të Riccardo Sottil i cili po shkonte drejt sulmuesit Vlahovic i vetmuar brenda zonës napolitane.

Kjo ishte fitorja e shtatë radhazi për Napolin në po kaq ndeshje deri tani në Serie A, që e bën atë lider me 21 pikë. Interi mbetet mbrapa me 17 dhe Milani i treti me 16. Ky i fundit takohet me Atalantën sonte më vonë.

Rrahmani do të kërkojë ta bartë formën e mirë në ekipin kombëtar të Kosovës, të cilit do t’i bashkohet gjatë javës së ardhshme për dy ndeshjet kualifikuese për Kupën e Botës dhe Suedinë dhe Gjeorgjinë.

Ish-mbrojtësi i Veronës e ka fituar besimin e Spallettit dhe tani parapëlqehet para grekut Kostas Manolas.

Manolas ishte titullar në tri ndeshjet e para në ligë, por që prej atëherë Rrahmani e ka zënë vendin e tij në katër ndeshjet e fundit dhe ka kontribuar me dy gola.

Shpërndaje.
© RAJONIPRESS