Rovena gjen prehje të dasmat

Tash Rovena nuk po këndon shumë në klube, por në dasma. Këngëtarja Rovena në një intervistë për Kosovarja ka treguar planet e saj dhe punën gjatë verës, përderisa këngëtarja ka thënë se kësaj radhe ajo i pret publikun e saj edhe në ahengje të ndryshme.

“Ju pres në dasma! Ky sezon më ka gjetur mjaft të ngarkuar me banketet e shumë familjeve shqiptare, me të cilët së bashku do të ndajmë ditën më të lumtur të çifteve tanë të rinj. Do jem në Prishtinë, Gjilan, Pejë, Bujanoc, Preshevë, Prizren, Kërçovë, Tetovë, Gostivar, Shqipëri…”, ka thënë ajo.

Këngëtarja është arsyetuar për arsyen se pse vitet e fundit nuk e hapi klubin e saj “Rovena Club” në Durrës, i cili kishte qenë i hapur nga viti 2007-2011.

“Në fakt, për shkak të angazhimeve në dasma çdo ditë, e kam të pamundur të këndoj edhe atje, për më tepër që koha në të cilën punova në Durrës (2007-2011), ishte një kohë e turizmit të artë atje, pasi tashmë i gjithë bregdeti shqiptar është populluar nga pushuesit. Edhe zona të tjera janë bërë po aq të frekuentuara si, bie fjala, Shëngjini, Velipoja, Vlora, Saranda etj”.

Ajo tash ka prezantuar edhe një album ku këndon “live” këngë të dasmave.