Rojet e pyjeve pajisen me pushkë gjuetie

Gjilan – Malet e Gjilanit do të jenë më të sigurta sa i përket dëmtimit të masës drusore, sepse sot janë armatosur 11 roje të pyllit. Komuna e Gjilanit ka bërë pranimin dhe dorëzimin e 11 armëve të gjuetisë për rojet e pyllit, në mënyrë që pyjet të ruhen më mirë dhe personi zyrtar të jetë më i sigurt gjatë kryerjes së detyrës zyrtare. Armët janë siguruar nga Agjensioni Pyjor i Kosovës dhe janë sjellë për të mundësuar një ruajtje më efikase të pyjeve.

Me këtë rast personi zyrtar i caktuar nga kryetari i Komunës për pranimin e këtyre armëve, Fadil Kajtazi, ka thënë se sot ka bërë pranimin e armëve dhe dorëzimin e tyre bashkë me drejtorin e Bujqësisë dhe Pylltarisë, Razmiz Ramadanin, për rojet e pyjeve. Armët e gjuetisë, me mekanizëm gjysmë – automatik, nuk kanë ndonjë destinim të caktuar, por janë në shërbim të ruajtjes së pyjeve, sepse deri më tani pasuria shtetërore është dëmtuar nga persona të pandërgjegjshëm. Kajtazi ka thënë se nga tash rojet e pyllit janë veshur me autoritet.

Ndërsa drejtori i Bujqësisë dhe Pylltarisë, Ramiz Ramadani, ka thënë se armatosja e rojeve të pyllit është një hap më tutje për vendosmërinë e Institucioneve komunale për mbrojtjen e pasurisë shtetërore, e cila është dëmtuar për vite me radhë. Ramadani ka thënë se të gjithë rojet e pyllit janë të trajnuar për përdorimin e armëve dhe kjo ishte një kërkesë e kamotshme e tyre.

Tash e tutje punëtori zyrtar ka një siguri më të madhe në punë gjatë monitorimit, por duhet një vetëdijesim i gjerë për ruajtjen e pyjeve, sepse rëndësia e tyre është jetike./rajonipress/