Riza Halimi: Pozita e shqiptarëve në Serbi më e keqe se përpara

Deputeti i Partisë për Veprim Demokratik, Riza Halimi, në kuadrin e pyetjeve të deputetëve në mbledhjen e Kuvendit të Serbisë, pyeti Qeverinë e se çfarë ka ndërmarrë për të penguar shkatërrimin e pronave dhe kanosjen e jetëve të shqiptarëve në këtë vend.

“Pas ndeshjes futbollistike midis Serbisë e Shqipërisë, sikundër edhe në vitin 2008, kanë ndodhur sulme të rënda mbi shqiptarët dhe pronat e tyre. Shtroj pyetjen se çfarë është ndërmarrë për të penguar këto dhe kërkoj nga qeveria të sigurojë raport mbi masat e ndërmarra rreth kompensimit të dëmeve si dhe në aspektin e ndëshkimit të autorëve përgjegjës”, ka thënë Halimi.

Ai ka vlerësuar se pozita e shqiptarëve (në Serbi) sot është më e keqe se përpara dhe ka rikujtuar se në Preshevë është hequr Gjykata Themelore dhe se Këshillit Kombëtar të Shqiptarëve i është ulur financimi për 30 për qind.