Rinor Selmani “bomberi” i hendbollit
RajoniPress
12:17, 6 Prill, 2023
Klubi i Hendbollit Drita në mënyrë spektakolare në Ligën e Parë të hendbollit të Kosovës është shpallur kampion i Kosovës, duke u rikthyer në Superligën e Kosovës.
Nga 14 takimet e zhvilluara, KH Drita ka shënuar po aq fitore, duke dëshmuar se ky klub e ka vendin në Superligë të Kosovës. Një mobilizim të tillë brenda klubit kishte ekzistuar që në fillim të kampionatit, dhe së bashku me kryesinë e klubit dhe të gjithë hendbollistët kanë dhënë kontribut të jashtëzakonshëm edhe pse gjatë rrugëtimit të tyre kishin probleme të mëdha financiare, por dashuria për tu rikthyer në Superligë i ka mposhtur të gjitha barrierat.
Njëri ndër më të merituarit për këto suksese padyshim është kapiteni i skuadrës dhe “bomberi” i pamëshirshëm në portat kundërshtare Rinor Selmani, i cili nga 14 takimet e zhvilluara ka shënuar 160 gola, me një mesatare 11.4 gola për ndeshje.
“Ka qenë një kampionat shumë i vështirë por synimi ynë ishte rikthimi në Superligë. Jam shumë i lumtur që kam kontribuar për sukseset e klubit, por nuk duhet mohuar as kontributin e secilit bashkëlojtarë të cilët kanë kontribuar që të shpallemi kampion pa asnjë humbje”, thekson kapiteni Rinor Selmani. Selmani i cili luan në pozitën e qendrës, pas shpalljes si kampion me skuadrën e tij ka një porosi për të gjithë ata që e dojnë hendbollin por edhe për të gjithë afaristët e qytetit. “Kemi pasur probleme të natyrave të ndryshme, të themi të gjërave elementare sa i përket mjeteve financiare, por kemi qenë të gjithë të bashkuar për ta bërë skuadrën kampion me gjithë këto vështirësi dhe për këtë e falënderoj çdo bashkëlojtar timin të cilët nuk kursyen asgjë. Tani kur do të fillojmë në Superligë nëse nuk na ndihmohemi nga bizneset e ndryshme do të jetë vështirë të mbijetojmë pasiqë kostoja e financimit do të jetë më e madhe. Unë ju kisha bërë apel të gjitha bizneseve të qytetit që të na dalin në ndihmë për të mirën e klubit dhe për të mirën e rinisë të cilët e dojnë hendbollin”, thekson golashënuesi më i mirë në Ligën e Parë, Rinor Selmani.
