Rikthehet Fatmir Matoshi: Projektet e nisura do t`i përfundojmë me qeverinë e ardhshme

Gjilan – Ish ministri i Ambientit dhe Planifikimit Hapësinor, Fatmir Matoshi i është rikthyer sërish politikës. Së fundmi ai është prezantuar si një nga kuadrot dhe udhëheqësit e NISMA Socialdemokrate nga Kryetari i kësaj partie Fatmir Limaj.

“Ardhja e Fatmir Matoshit, një personaliteti të shquar, është dëshmia më e mirë se Nisma Socialdemokrate është adresa e duhur për të gjithë ata që duan ta japin kontributin e tyre për vendin” ka thënë Limaj ditë më parë gjatë prezantimit të Matoshit në strukturat e NISMA Socialdemokrate.

Në një bisedë me Rajonipress, Fatmir Matoshi ka thënë se fokus i tij mbeten çështjet mjedisore në përgjithësi si dhe mbështetja për Anamoravën në veçanti.

“Ka më shumë se katër vite që nga koha kur jam larguar nga Ministria e Mjedisit dhe projektet kapitale dedikuar Anamoravës, nuk kanë bërë as edhe një lëvizje përpara. Janë dhjetëra miliona euro të siguruara për Hidrosistemin Kikë – Kremenatë si dhe për Impiantet e ujërave të zeza që disa nga ato vazhdojnë të mbeten të pashfrytëzuara dhe disa tjera të ridestinuara në punë të vogla e të një rëndësie shumë dytësore, ndërsa projektet e mëdha as që kanë lëvizur. Fokusi im do të jetë që këto projekte të fillojnë sa më parë. Si në kuvend ashtu edhe në qeverinë e ardhshme të Kosovës do të jem shumë i angazhuar që Kosova në përgjithësi dhe Anamorava në veçanti t`i kenë të zgjidhura sa më parë problemet e furnizimit me ujë të pijshëm përmes ujëmbledhësve të ri si për Kamenicën ashtu edhe për Gjilanin e Vitinë, sikundër që sa më parë të ndërtohen Impiantet e trajtimit të ujërave të zeza. Është për keqardhje që kemi humbur katër vite pa bërë asnjë progres të vetëm”.

Matoshi ka thënë se në zgjedhjet e ardhshme do të garojë për deputet dhe pret që NISMA së bashku me AAK-në të jenë pjesë e rëndësishme e qeverisë së re.

“Po, do të kërkoj besimin e qytetarëve, tanimë kam dhënë shembuj të mjaftueshëm se në pak muaj udhëheqje kam arritur të bëjë punë mjaft të mira, e kemi mbështetur Gjilanin me shumë projekte, sikundër edhe Kamenicën e Vitinë si zona të lëna pasdore nga qeveritë e Kosovës. NISMA synon që së bashku me AAK që përbëjmë frontin opozitar dhe partnerët e tjerë pas zgjedhjeve, vendit ti ofrojmë në radhë të parë sigurinë, vullnetin dhe mundësitë për të jetuar në shtetin tonë, mjedisin e mirë e të përshtatshëm, ekonominë e zhvilluar, shëndetësinë, arsimin dhe infrastrukturën që e bën vendin tonë të dëshirueshëm për të jetuar në të” tha Matoshi.

Matoshi si Ministër i MMPH kishe mbështetur me rreth 3 milion euro projektet mjedisore në Gjilan në vitet 2018-2019, si dhe kishte udhëhequr procedurat e nevojshme për projektin e Impiantit të ujërave të zeza në Gjilan, projekt me vlerë mbi 30 milion euro dhe i financuar nga Banka Evropiane për Zhvillim e Rindërtim, që pastaj pati ngecje, dhe për këtë ishte falënderuar nga Ish Kryetari Lutfi Haziri që vjen nga LDK, aso kohe parti opozitare e qeverisë.

Gjithashtu Matoshi ka siguruar mbështetjen financiare dhe udhëhequr bisedimet me Bankën Botërore për Projektin e Hidrosistemit Kikë-Kremenatë./rajonipress/