Richter bëhet piktori më i shtrenjtë

Artisti gjerman Gerhard Richter është bërë piktori i gjallë me veprën më të shtrenjtë në botë. Një pikturë abstrakte e tij ka thyer rekordin e shitjes në një ankand, duke u blerë për 34,2 milionë dollarë. Piktura është shitur të premten mbrëma në shtëpinë e ankandeve në Londër “Sotheby”, e cila edhe ka dhënë lajmin nëpërmjet një komunikate për medie.

Kjo pikturë, e cila mban titullin “Abstraktes Bild (809-4)”, ka qenë pjesë e koleksionit të rock kitaristit Eric Clapton i cili e kishte vlerësuar atë si një kryevepër që shpërfaq kaosin. Atë e ka blerë një koleksionist i cili ka kërkuar të mbetej anonim.

Rekordin e veprës më të shtrenjtë të një artisti i cili ende jeton e mbante piktura “Flag” e artistit Jasper Johns, e cila në vitin 2010 ishte shitur për 28,6 milionë dollarë në shtëpinë e ankandeve në New York, “Christie”. Piktura e Richterit, ku dominon e kuqja, e verdha dhe e zeza ishte nxjerrë në ankand me një çmim fillestar prej 14 deri 19 milionë dollarësh.

“Kombinimi i artit të piktorit dhe kualitetit të lartë artistik të veprës ka bërë që adhuruesit e pikturave të bëjnë ‘luftë’ për ta blerë këtë vepër. Shitja e saj përbën, natyrisht, një moment historik për shtëpinë tonë të ankandeve”, ka thënë Alez Branczik, drejtor i shitjes në shtëpinë e ankandeve “Sotheby”.(express)