Riad Rashiti i kundërpërgjigjet Alban Hysenit: “PDK nuk e ka uzurpuar objektin, ai u çlirua pas luftës”

Gjilan – Kryetari i Degës së PDK-së në Gjilan, Riad Rashiti, ka reaguar ashpër ndaj deklaratave të kryetarit të Komunës së Gjilanit, Alban Hyseni, lidhur me pretendimet për uzurpimin e pronës publike nga Partia Demokratike e Kosovës.

Në reagimin e tij publik, Rashiti e akuzon Hysenin se po përpiqet të largojë vëmendjen nga, sipas tij, problemet dhe dështimet në qeverisjen komunale, duke sulmuar opozitën dhe veçanërisht PDK-në.

“Thonë se mbrojtja më e mirë është sulmi. Andaj, ky kryetar arrogant i Komunës së Gjilanit, në pamundësi për të arsyetuar anarkinë e tij në qeverisjen komunale, po sulmon opozitën, e në veçanti PDK-në, për gjoja uzurpim të pronës publike”, thuhet në reagimin e Rashitit.

Ai rikujton se selia e PDK-së ndodhet në atë objekt që nga viti 1999, duke theksuar se objekti nuk është uzurpuar, por është çliruar pas përfundimit të luftës nga strukturat e ish-UDB-së serbe.

Sipas tij, menjëherë pas çlirimit, në atë objekt ishte vendosur shtabi i UÇK-së, me komandantin e Zonës Operative të Karadakut, Ahmet Isufi, dhe Ismajl Kurteshin në cilësinë e kryetarit të qeverisjes së përkohshme të Komunës së Gjilanit.

Rashiti shton se pas themelimit të institucioneve komunale, objekti ka vazhduar të shërbejë si seli e PDK-së, ku aktivitet politik kanë zhvilluar figura si Ismajl Kurteshi, Hydajet Hyseni, Shemsi Syla dhe personalitete të tjera që, sipas tij, sot janë pjesë e familjes politike të Lëvizjes Vetëvendosje.

“Nëse ju e quani uzurpator PDK-në, atëherë uzurpatorët e këtij objekti janë pjesë e rëndësishme e vendimmarrjes politike të VV-së”, deklaron ai.

Në reagim, Rashiti vlerëson se kryetari Hyseni e ka humbur debatin publik përballë, siç i quan ai, skandaleve që po shfaqen çdo ditë në qeverisjen komunale dhe për këtë arsye po përpiqet ta zhvendosë vëmendjen te objekti i PDK-së.

Ai bën të ditur se PDK është e gatshme që në seancën e ardhshme të Kuvendit Komunal të diskutohet çështja e objekteve të kontestuara dhe deklaron se partia do ta respektojë çdo vendim institucional, përfshirë edhe zhvendosjen eventuale të selisë së saj.

“PDK ju fton publikisht që në seancën e radhës të Kuvendit Komunal të futet në rend dite çështja e objekteve të diskutueshme dhe është plotësisht e gatshme të respektojë dhe zbatojë çdo vendim të institucioneve komunale, deri edhe në zhvendosjen e selisë së PDK-së”, thuhet në reagim.

Rashiti i kërkon kryetarit të komunës që fillimisht të japë shembull në lirimin e pronës publike, duke pretenduar se një familjar i tij ka uzurpuar hyrjen e një objekti kolektiv dhe e ka shndërruar atë në lokal afarist, ndërsa, sipas tij, komuna nuk ka ndërmarrë asnjë veprim.

Në fund të reagimit, ai drejton akuza të ashpra politike ndaj Alban Hysenit, duke e cilësuar atë si “mashtruesin më të madh të qytetarëve të Gjilanit” dhe duke e akuzuar për manipulim gjatë ushtrimit të mandatit të tij si kryetar i komunës./rajonipress/