Rezultati i Qeverisë së oligarkëve: Importi mbi 2.5 miliardë euro

Ekonomia kosovare e rrënuar nga korrupsioni dhe evazioni fiskal. Prodhuesit u harruan, tregu i vërshuar nga mallrat e botës

Përfaqësuesit e bizneseve në Kosovë thonë se politikat e deritashme ekonomike të Qeverisë janë të çuditshme, sepse parimisht Kosova është vendi i vetmuar në rajon që “subvencionon” tregtarët, kryesisht ata që kanë lidhje me pushtetin, por jo edhe prodhuesit

Me gjithë premtimet se Qeveria e tij do të përkrahë dhe do të subvencionojë prodhuesit vendorë, sundimi 13 mujor i dyshes Isa Mustafa-Hashim Thaçi ka dëshmuar se kësaj garniture pushtetarësh as që u intereson fare për prodhuesit vendorë.

Mustafa, sikurse Thaçi, është me të madhe duke i favorizuar tregtarët, përkatësisht bizneset që importojnë mallra nga jashtë, duke e bërë vendin të varur nga importet.

Brenda një viti, sipas zyrtarëve të Doganave, mësohet se Kosova ka importuar mallra në vlerën e 2 miliardë e 500 milionë eurove, kurse që eksportet në të njëjtën kohë janë diku vetëm afro 500 milionë euro.

Lahi Brahimaj, deputet opozitar, e ka akuzuar Qeverinë se me politikat e veta të mbrapshta ekonomike e ka shndërruar vendin në një “oazë” të mallrave të huaja, duke ndikuar kësisoj që Kosova të bëhet një vend ku “subvencionohen” vetëm tregtarët por jo edhe për prodhuesit. “Politikat e mbrapshta ekonomike të kryeministrit Isa Mustafa dhe ato të mëhershme të Hashim Thaçit e kanë shndërruar Kosovën në një vend ku nëse i ke punët mirë me politikë mund të marrësh tender, mund të avancohesh dhe mund të krijohen lehtësira”, tha ai./kosova sot/