Rezervisti rrëmbeu dhe zhduku Bajramin

Më 16 prill të vitit 1999, në stacionin e autobusëve policë me uniforma serbe kishin ndalur një makinë me tre shqiptarë. Në të ndodhej edhe Haki Bajrami, i cili që nga ajo ditë më kurrë se pa familja e tij. Emri i tij për shumë vjet rezultonte në listat e të zhdukurve. Para disa vitesh Haki Bajrami u gjet i varrosur në varrezat e lagjes Dragodan në Prishtinë, i vrarë me armë zjarri.

Për fat të mirë shoferi i makinës dhe i vëllai Bujar Bajrami janë lënë të lirë. Ata janë dëshmitarë të kidnapimit të Haki Bajramit, për të cilin pas më shumë se 14 vitesh është arrestuar një serb, shtetas i Kosovës.

Ivan Radivojeviq është kapur të premten në pikë kalimin kufitar ndërmjet Kosovës dhe Serbisë në Jarinje, si i dyshuar për krime lufte. Ai është kapur derisa po largohej nga Kosova. Gazeta “Tribuna” mëson se arrestimi i tij është kryer me urdhër arrest të prokurorit të EULEX-it nga Prokuroria Speciale e Kosovës.