Rey Manaj po shkëlqen në Turqi, pritet të thyejë rekord të transferit

Pas disa “aventurave” të këqija, në shumë skuadra elitare anë e mbanë Evropës, duket se “bomberi” nga Lushnja, Rey Manaj ka “rilindur” te turqit e Sivasspor, ku po kalon ndoshta një nga momentet më fantastike në karrierën e tij, teksa deri më tani numëron plot 15 gola, në 23 ndeshjet e regjistruar mes kampionatit e Kupës, në Turqi, duke u kthyer në një nga “yjet” e ekipit.

Të tilla statistika kanë mahnitur edhe bordin e turqve, me zëdhënësin për mediat të klubit turk, Gokhan Karagol, i cili ka treguar se për 26-vjeçarin ka një sërë ofertash, që do të shqyrtohen në fundin e sezonit, por gjithsesi brenda klubit janë të bindur se shitja e Manaj drejt një skuadre tjetër do të thyejë rekordin e 18-vjeçarit, Yunus Emre Konak, i cili u transferua për shifrën e 4.5 milionë euro, te skuadra e Brentford, përcjell abcnews.

“Po marrim oferta shumë serioze për Rey Manajn. Megjithatë, ne i kemi shtyrë të gjitha këto oferta për fundin e sezonit aktual. Pas Evropianit, ne presim që Manaj të thyejë rekordin historik të tranferimit”,- është shprehur Karagol, në një deklaratë për mediat, duke i dhënë kështu sinjale të forta edhe teknikut Sylvinho, për formën e “bomberit” lushnjar.