Rexhepi pranon se droga kalon përmes Kosovës

Ministri i Brendshëm, Bajram Rexhepi, ka pranuar se përmes Kosovës kalon një pjesë e mirë e drogës së Ballkanit, duke specifikuar se në të shumtën e rasteve kjo drogë është marihuanë dhe heroinë.

Sipas tij, kokaina kontrabandohet më shumë përmes Malit të Zi dhe Shqipërisë, shkruan Koha.

“Një prej rrugëve është edhe Kosova, mirëpo kjo rrugë kalon edhe nëpër vende tjera. Kur flasim për heroinën, është e vërtetë se pjesë e kësaj rruge përmes së cilës kontrabandohet kjo drogë, përfshinë edhe Kosovën, e që më pas shkon nga Afganistani, Irani, më pas nga Turqia, Bullgaria, Greqia, Serbia, Maqedonia, Kosova e më tej”, ka thënë Rexhepi.

Sipas fjalëve të tija, marihuana më së shumti vjen nga Shqipëria, ndërsa kokaina përmes Shqipërisë dhe Malit të Zi.
“Megjithatë, po flasim për sasi të vogla, dhe nuk mund të themi se [Kosova] është ndonjë kanal. Në vend të parë është marihuana apo kanabisi, ndërsa në të dytin është heroina”, ka thënë Rexhepi për të përditshmen e Podgoricës, “Dnevne novine”.

Ai shton se nuk ka informacione konkrete për grupe të organizuara kriminale që merren me tregtinë e drogës, mirëpo as nuk e mohon ekzistimin e grupeve të tilla. /Indeksonline/