Rexhepi në Brommapojkarna

Dardan Rexhepi i ka dhënë fund aventurës te skuadra e Malmos. Sulmuesi kosovar i është bashkuar ekipit suedez IF Brommapojkarna.

22 vjeçari kishte kontratë me Malmon edhe një vit dhe ishte në kërkim të një klubi ku do të luante në një periudhë afatgjate.

Për të, interesim kishte shprehur edhe Falkenberg, por në fund më e shkathtë u tregua Brommapojkarna.

“Jam në një fazë të karrierës sime që kam nevojë për të luajtur në vazhdimësi. Më pëlqen loja e BP dhe besoj se i përshtatet lojës sime”, shpjegon Rexhepi, i cili kishte përfunduar në bankinë në Malmo, pas rikthimit të Guillermo Molins.

Rexhepi ishte transferuar në Malmo në janar të vitit 2009 nga Lunds BK. Ai ka zhvilluar 43 ndeshje dhe ka realizuar 38 gola me ekipin U-19, para se trajneri Roland Nilsson ta merrte atë në ekipin e parë, në fillim të sezonit 2010/11.

Dardani kishte debutuar kundër Syrianskas në Kupën e Suedisë më 18 maj 2010, derisa me Malmon është shpallur dy here kampion i Suedisë.