Rexhepi akuzon UNMIK-un se kishte ndërprerë politikisht hetimet për masakrën

Ish-ministri i Punëve të Brendshme, Bajram Rexhepi, ka dëshmuar në procesin gjyqësor kundër Oliver Ivanoviqit që po zhvillohet në Mitrovicën Veriore.

Rexhepi iu është përgjigjur pyetjeve të prokurorit të rastit, që kishin të bënin me rolin e Ivanoviqit në periudhën ndërmjet viteve 1999 dhe 2000 dhe funksionimin e strukturës së njohur “Rojat të Urës”.

Për ndërprerjen e hetimeve, që xhandarmëria franceze kishte nisur për masakrën e 14 prillit të vitit 1999, Rexhepi ka akuzuar UNMIK-un, që sipas tij, e kishte bërë një gjë të tillë me një vendim politik, për interes të stabilitetit politik.

Ish-kryeministri dhe ministri i brendshëm Rexhepi, ka thënë se iniciator të incidenteve, rrahjeve e ndoshta edhe vrasjeve kanë qenë “Rojat e Urës”, të cilat ishin krijuar me ndihmën e Ivanoviqit, derisa sipas aktakuzës së ngritur, ai thuhet të ketë vepruar si udhëheqës i këtij grupi famëkeq.

Ivanoviq së bashku me katër persona të tjerë, akuzohen për krime kundër popullatës civile në vitet 1999-2000. Në procesin kundër Ivanoviqit dhe të tjerëve, pritet të dëshmojë edhe avokati Mahmut Halimi, që në atë kohë ishte gjykatës hetues i masakrës së 14 prillit në Lagjen e Kovaqëve, ku ishin vrarë 24 burra shqiptarë.

© KOHA