Rexhep Qosjes, çmimi letrar “Drita e Minatorit”

Mitrovicë – Akademik Rexhep Qosjës, iu nda çmimi i edicionit të dytë të manifesitmit ndërkombëtar “Drita e Minatorit”, që u mbajt të shtunën në Mitrovicë. U tha se emri i Qosjes nderon këtë manifestim letrar që organizohet nga Lidhja e Shkrimtarëve të Kosovës dhe Shoqata e Shkrimtarëve të Mitrovicës me mbështetje të Ministrisë së Kulturës dhe Drejtorisë Komunale për Kulturë.

Vendimin për ndarjen e këtij çmimi e lexoi, Shyqri Galica, nënkryetar i Lidhjes së Shkrimtarëve të Kosovës (LSHK). Ai tha se figura e Qosjes është komplekse, meqë në vetë përfshin shkrimtarin, kritikun, historianin e letërsisë, politikologun dhe njeriun që gjithë jetën ia kushtoi zgjidhjes së çështjes shqiptare.

Ndërsa, kryetari i LSHK-së, Adem Demaçi, i cili ka ndarë çmimin për akademik Qosjen, kërkoi me tepër mbështetje nga insitucionet për shkrimtarët dhe organizatat e tyre. Ai tha ata meritojnë më shumë, siç meriton edhe Mitrovica të ketë një manifestim dinjitoz.

Ndërsa akademik Qosja, pasi ka marrë çmimin letrar, tha se në moshën e tij gjërat pranohen me qetësi. Megjithatë, pranoi se çmimi “Drita e Minatorit”, përbën përjashtim në këtë rast. “Ky çmim më sjell gëzim, meqë mban emrin e minatorëve, të cilët e ndriquan Kosovën dhe u bënë pjesë e historisë më të ndritur të saj”.

Poashtu ai tha se ndjehet i nderuar meqë këtë çmim e merr nga dora e një njeriu të veçantë, nga dora e një veprimtari të shquar të çështjes kombëtare, siç është Adem Demaqi.

Të pranishmit i ka përshendetur edhe kryetari i komunës, Avni Kastrati si dhe zëvendësministri i Kulturës, Hajdin Abazi.

Shpërndaje.
© RAJONIPRESS