Rexhep Aliu paditë mediat serbe për shpifje, thotë se nuk është terrorist

Gjilan – Rexhep Aliu i njohur me nofkën e luftës si komandant “Karadaku”, ka paditur mediat serbe për shpifje meqë portalet e Serbisë kanë dezinformuar se Rexhep Aliut i janë gjetur armë në fshatin Depcë dhe se i njëjti ka tentuar që me këto armë të sulmojë bazën ushtarake në Peqenje. Më lini rehat se nuk jam terrorist, unë jetojë në Gjilan dhe jam krenar që kam marrë pjesë në luftën e UÇPMB-së, e cila solli paqe në Luginë shprehet Aliu.

Rexhep Aliu pjesëtar i dy luftërave të UÇK-së dhe UÇPMB-së nuk po ndihet rehat meqë sipas tij janë mediat serbe që vazhdimisht shpifin dhe dezinformojnë kundër tij.

Rasti më i freskët që mediat serbe e kanë ndërlidhur si terrorist dhe njeri të rrezikshëm ka ndodhur më 31 dhjetor 2018 ku ishte dezinformuar se në fshatin e tij të lindjes në Depcë janë gjetur armë të cilat i përkasin “terroristit” Rexhep Aliu.

Gjithnjë sipas mediave serbe Rexhep Aliu me këto armë kishte planifikuar të sulmojë bazën ushtarake në Peqenje. “Mediat serbe po dezinformojnë se gjoja unë kam dërguar armatim në Depcë, aty është gjetur armatim 6 armë, mediat kanë postuar fotot dhe emrin tim gjoja se unë kam dashur ta sulmojë bazën ushtarake në Peqenje, por kjo nuk është e vërtetë dhe për këtë arsye kam angazhuar avokat i cili i ka paditur për shpifje disa portale që kanë dezinformuar rreth emrit tim” shprehet Aliu.

E vërteta sipas Aliut është se ai asnjëherë nuk është përzier e as që ka marrë pjesë në punë të tilla që nga përfundimi i luftës. “E lus median serbe që të më lënë rehat sepse unë jam njeri familjar e assesi terrorist dhe i kamë shërbyer me besnikëri kodit etik të një ushtaraku në UÇK dhe më pas në UÇPMB. Lufta ka përfunduar, por propaganda serbe vazhdon me të njëjtin stil t`i njollos pjesëtarët e luftës dhe të gjithë ata që kanë kontribuar që paqja të arrihet në Kosovë dhe Luginë” u shpreh Aliu./rajonipress/