Restaurohen katër flamuj historikë

Katër flamujt historikë, që u identifikuan në fondin e etnografisë të Qendrës Albanologjike Shqiptare, kanë filluar të restaurohen në Muzeun Historik Kombëtar. Sipas restauruesit udhëheqës, Frederik Stamati, para 100-vjetorit të Pavarësisë do të bëhet vetëm një restaurim i pjesshëm i tyre, para se ato të restaurohen tërësisht.

Sipas Stamatit, gjendja më e rëndë është ajo e flamurit të princ Vidit, megjithëse problem paraqet flamuri që mendohet të jetë valëvitur në ndërtesën e Qeverisë së Vlorës, më 1913, flamuri që u përdor në ceremoninë mortore të Ismail Qemalit, dhe flamuri i luftës së Vlorës, që i përket vitit 1920.

Këta katër flamuj historikë, së bashku me flamurin e Kongresit të Lushnjës dhe me objekte tjera të rëndësishme, do të ekspozohen për publikun e gjerë në një ekspozitë të rrallë në Muzeun Historik Kombëtar.