Reshjet e dendura shkaktojnë vërshime në Viti, dëmtohen dhjetëra shtëpi – Komuna garanton kompensimin e dëmeve

Viti – Reshjet e rrëmbyeshme të shiut që përfshinë sot territorin e Komunës së Vitisë kanë shkaktuar vërshime të mëdha në disa lokalitete, duke lënë pas dëme të konsiderueshme materiale, veçanërisht në fshatrat Sllatinë e Epërme dhe Sllatinë e Poshtme ka shkruar Arton Musliu.

Si pasojë e përmbytjeve, shumë shtëpi u përfshinë nga uji, ndërsa një objekt banimi u shemb plotësisht. Fatmirësisht, pavarësisht situatës së rëndë, nuk raportohet për persona të lënduar apo viktima.

Menjëherë pas krijimit të gjendjes emergjente, institucionet komunale mobilizuan të gjitha kapacitetet në terren. Ekipet e Drejtorisë për Shërbime Publike dhe Emergjenca, Njësia e Zjarrfikësve, Policia e Kosovës, si dhe qytetarë vullnetarë, u angazhuan për t’u ardhur në ndihmë familjeve të prekura, duke punuar për menaxhimin e situatës dhe minimizimin e pasojave të vërshimeve.

Autoritetet komunale kanë bërë të ditur se do të realizohet vlerësimi i plotë i dëmeve të shkaktuara, ndërsa kanë garantuar se të gjitha dëmet materiale do të kompensohen në përputhje me procedurat dhe legjislacionin në fuqi.

Komuna e Vitisë u ka bërë thirrje qytetarëve të vazhdojnë të tregojnë kujdes dhe të bashkëpunojnë me institucionet përgjegjëse deri në normalizimin e plotë të situatës në zonat e prekura./rajonipress/