Reportazhi për shqiptaren e përdhunuar merr çmimin e parë

Artikulli i gazetares Rafaela Roth të portalit “Watson” mban titullin “Luana – si u detyrua të martohej në Kosovë dhe ta merrte me vete në Zvicër dhunuesin e saj”.

Reportazhi mbi Luanën, vajzën shqiptare nga Zvicra, të martuar me detyrim, është shpërblyer me çmimin e parë nga fondacioni i “Medienpreis Aargau/Solothurn”. Reportazhi qe botuar vitin e kaluar në portalin e njohur “Watson” ndërsa autore e tij është gazetarja e këtij portali, Rafaela Roth.

Çmimi i cili ka “peshën” në para prej 3000 frangash, i është ndarë gazetares në fjalë në mbrëmjen e të hënës në teatrin e qytetit në Olten, shkruan watson.ch.

Reportazhi i shpërblyer mban titullin “Luana – si u detyrua të martohej në Kosovë dhe ta merrte me vete në Zvicër dhunuesin e saj”. Ai bën fjalë për rrëfimin e një kosovareje të re e cila në Zvicër detyrohet të ndahet nga bashkëshorti i saj për të shmangur kështu dhunën, zhveshjen nga të drejtat dhe abuzimin seksual, përcjell albinfo.ch. Kjo ndarje e ka sjellë atë jo vetëm para problemeve juridike por edhe në konflikt me konceptin e nderit dhe me rolet e gjinive në kulturën e vendit të saj të prejardhjes.

Gjykata e Qarkut në Lenzburg (Kanto i Aargau) e ka shpallur fajtor burrin e Luanës për përdhunim të shumëfishtë seksual por Gjykata e Lartë e Aargaut më vonë e ka hedhur poshtë këtë vendim, duke u mbështetur në parimin “in dubio pro reo” (Në rast dyshimi, pro të akuzuarit).

Vendimin e jurisë e ka arsyetuar Lukas Mäder, anëtar nga radio SRF, përgjegjës për kategorinë online. Ai ka thënë se Roth “me të gjitha mjetet e saj hulumtuese dhe stilistike ia ka bërë publikut të gjerë të Zvicrës fatin tragjik të një të reje kosovare në mes të shoqërisë zvicerane. Me këtë, Roth i ka dhënë një zë jo vetëm Luanës por edhe të gjitha grave tjera që jetojnë në fushën e tensionit në mes të kulturave të vendeve të prejardhjes dhe botës moderne.

Reportazhi i shpërblyer është botuar edhe nga albinfo.ch, i përkthyer në gjuhën shqipe, menjëherë pas publikimit të tij në origjinal, në portalin Watson.ch