Remzije Osmani me plot momente jetësore

Remzie Osmanin,të njohur këngëtare e bëri zëri i saj i veçantë, por edhe shumë i pëlqyer i publikut, i cili e fton gjithandej nëpër mbrëmje muzikore,ahengje e dasma.

Paraqitja e saj e parë para publikut më 1977 me këngën “Lute lute nëna bijën”., e bëri që të kuptosh, se kjo e re nga Mushtishti, gurra e këngëtarëve më të mirë shqiptarë do bëhet këngëtare e shkëlqyer në botën e muzikës.

Ashtu edhe ndodhi. Sot, Remzija është njëra ndër këngëtaret tona më të kërkuara e muzikës sonë të mirëfilltë shqipe. Ajo ka një karrierë me të cilën sot mund të mburret. Është e dashur,e pëlqyer dhe shumë e kërkuar gjithandej, në trojet shqiptare, në dasma e ahengje,por edhe në diasporë nëpër mbrëmje muzikore tek mbushen sallat plot me bashkatdhetarë, të cilët këngëtaren tonë e vlerësojnë shumë lartë.

E pëlqejnë Remzijen,por edhe në duet me vëllaun e saj Nexhatin, me të cilin ka vite që bashkëpunojnë e realizojnë këngë e klipe të shumta e të pëlqyera për gjithë brezat.

Mbase kanë të drejtë ata që mendojnë e thonë: kudo që shfaqet e këndon Remzija e kallë atmosferën .

Ajo me zërin dhe energjinë e saj bën që edhe me nga tri orë t’mos ndalet as të ndahet nga këndimi. Dhe gjithmonë live.

Bagazhi i saj si këngëtare është shumë i pasur: me afro njëmijë paraqitje para publikut,pjesëmarrëse në shumë festivale,shpërblime të ndryshme, me afro 3o albume personale e shumë klipe.

Nuk janë këto pak, duke e marrë parasysh se ajo është edhe bashkëshorte dhe nënë e dy fëmijëve.