Rektori kërkon bashkëpunëtorë

Pesë prorektorë do të ketë Universiteti i Prishtinës (UP) “Hasan Prishtina”. UP-ja do të ketë prorektorin për buxhet dhe financa, mësimdhënie dhe çështje për studentë, kërkime shkencore, bashkëpunim ndërkombëtar, si dhe zhvillim të cilësisë. Lista me emrat e propozuar për prorektorë, nga rektori Ramadan Zejnullahu pritet të publikohet të enjten, për herë të parë në mbledhjen e Senatit, dhe më pas të adresohen në Këshill Drejtues për votim.

Ndonëse kjo listë po mbahet si “sekrete” nga rektori Zejnullahu me qëllim që bashkëpunëtorët e tij të mos përballen me ndonjë formë të presionit, emrat që përmenden nga profesorët universitarë si të kontaktuar nga rektori janë Eda Vula profesoreshë në Fakultetin e Edukimit, e cila vjen nga fusha e matematikës, Qerim Qerimi profesor në Fakultetin Juridik në fushën e diplomacisë, Arbnor Pajaziti profesor në Fakultetin e Inxhinierisë Mekanike, Ymer Havolli profesor në Fakultetin Ekonomik./zeri/