Rektori Hajrizi, panelist nga Kosova në konferencën “Creativity Forum Ljubljana”, në Slloveni

Rektori i UBT-së, Edmond Hajrizi po merr pjesë në konferencën dyditore “Creativity Forum Ljubljana”, të organizuar nga Ministria e Punëve të Jashtme e Sllovenisë dhe organizata “ Union for the Mediterranean”. Konferenca po i zhvillon punimet në Muzeun e Qytetit të Lubjanës, në Slloveni.

Hajrizi, me ftesën e Ministrisë së Punëve të Jashtme të Sllovenisë, ishte panelist në panelin më temë: “Ndërmarrësia dhe teknologjia kreative dhe rritja ekonomike”, ku u trajtua ndikimi i industrisë krijuese dhe kulturore në rritjen e ekonomisë globale, rastet e suksesit në vendet e rajonit të Ballkanit Perëndimor, krijimi i vendeve të punës, dizajnimi i sistemeve inovative bazuar në ekonominë cirkulare dhe roli i edukimit dhe shkathtësive për ekonominë digjitale.

Aty u tha se ngritja e ekonomisë globale ndikon në mënyrë automatike në shtimin e miliona vendeve të reja të punës në botë, në përmirësimin e cilësisë së jetës dhe në zhvillimin e mëtutjeshëm të qyteteve të zhvilluara dhe atyre në zhvillim e sipër.

Kjo konferencë ka për synim të fillojë një rrjet të ri policentrik të industrive kulturore dhe krijuese dhe të shërbejë si model për bashkëpunimin rajonal, për krijimin e vendeve të punës dhe për rritjen ekonomike, si një ndihmesë në krijimin e planit strategjik global të BE-së.

Ngjarja ka për qëllim të krijojë një forcë politike të nivelit të lartë që do të kërkojë të nxisë bashkëpunimin midis Ballkanit Perëndimor dhe Mesdheut Jugor, në aspektin e transferimit të praktikave të mira në Jug dhe në shkëmbimin e pikëpamjeve mbi një gamë të gjerë temash strategjike në Mesdhe./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).