Rektorati: Kushtet për regjistrim të vitit akademik nuk kanë ndryshuar

Kushtet për regjistrimin e vitit akademik për studentët e vitit të dytë dhe atij të tretë janë ato që parashihen me statut dhe që janë praktikuar deri më tani. Universiteti i Prishtinës (UP) “Hasan Prishtina” ka demantuar deklarimet se këto kushte kanë ndryshuar.

“Në mbledhjen e Senatit të Universitetit të Prishtinës të mbajtur më 20 nëntor 2014 është marrë vendimi për kushtet e regjistrimit të vitit në studimet e nivelit bachelor (dhe master), i cili do të fillojë të zbatohet nga viti akademik 2015/16. Ky vendim akoma nuk është nënshkruar në formën e tij përfundimtare, ndërsa drafti i hartuar para mbledhjes së Senatit ka dalë në disa media elektronike, duke shkaktuar shqetësim tek studentët dhe personeli akademik”, thuhet në reagimin e Universitetit, transmeton zeri.info.

Në një njoftim për media, Rektorati ka sqaruar se ideja është që vendimi të zbatohet shkallë-shkallë, gjatë tri viteve akademike vijuese.

“Kështu, duke filluar nga viti akademik 2015/16, studentët e vitit të parë regjistrojnë vitin e dytë me jo më shumë se një provim të mbetur nga viti i parë. Pastaj, duke filluar nga viti akademik 2016/17, viti i tretë regjistrohet me jo më shumë se dy provime të mbetura nga viti i dytë, me kusht që studenti t’i ketë dhënë të gjitha provimet e vitit të parë. Në vitin akademik 2017/18 po kjo rregull zbatohet edhe për regjistrimin e vitit të katërt të studimeve”, thuhet në njoftim.

Sipas këtij vendimi, studentët që aktualisht vijojnë vitin e dytë dhe të tretë do ta regjistrojnë vitin pasues me kushte të tanishme, siç përcaktohet me vendimin e Senatit nr. 1/916 të dt. 30.9.2014 i cili mund të merret nga web faqja e Universitetit./zeri/