Refuzohet masa e arrestit shtëpiak për policët që dyshohet se neglizhuan grabitjen në rastin Agmia

Gjilan – Sipas Gjykatës Themelore të Gjilanit nuk janë plotësuar kushtet ligjore për caktimin e ndonjë mase tjetër alternative ndaj të pandehurve Zoran Joviq, Ibrahim Robelli dhe Bislim Orana.

Prokuroria Themelore e Gjilanit kishte kërkuar masën e arrestit shtëpiak për policët e dyshuar, por gjyqtari i procedurës paraprake Aziz Shaqiri në aktvendimin e tij ka thënë se ndaj të dyshuarve nuk është vërtetuar se ka prova të mjaftueshme për të mbështetur dyshimin e bazuar se të njëjtit kanë kryer veprat penale.

“Gjykata konsideron se në veprimet e të pandehurve eventualisht mund të ekzistojnë tiparet e ndonjë vepre disiplinore, mirëpo vërtetimi i kësaj vepre penale nuk është kompetencë lëndore e gjykatës, por të ndonjë organi tjetër kompetent” thuhet në aktvendim.

Ndryshe tre policët dyshoheshin për keqpërdorim të pozitës zyrtare apo autoritetit. Ata sipas hetimeve fillestare dyshoheshin se kanë neglizhuar ose nuk kanë ndërmarrë masa për të ndaluar grabitjen e ndodhur në qendrën tregtare “Agmia”.

Avokati mbrojtës i Bislim Oranës, Shemsedin Pira tha se ky vendim ishte i pritur sepse në asnjë rrethanë nuk është dëshmuar se ata janë kryer të veprës penale./rajonipress/