Zv/ministri i Administrimit dhe Pushtetit Lokal, Basri Musmurati, nuk ka pranuar që PDK-së t’i vihet faji për zvarritjen e reformës zgjedhore. Ka thënë se zvarritjes i kanë kontribuar edhe partitë tjera që janë përfshirë në këtë proces. Megjithatë, në një intervistë për “Tribunën”, ai nuk ka qenë në gjendje të garantojë se zgjedhjet lokale nuk do të mbahen pa u ndryshuar dhe plotësuar sistemi aktual zgjedhor.
Ndërkohë, Musmurati ka hedhur poshtë pretendimet e partive opozitare, LDK-së dhe AAK-së, se vendimi i Qeverisë së Kosovës për themelimin e komunës së Hasit ka qenë politik dhe me tendencë për ta shpartalluar elektoratin e këtyre dy partive. Sipas tij, ky vendim ka ardhur pas disa kërkesave të përsëritura nga përfaqësuesit e Rogovës që Hasi të bëhet komunë, e që do të shërbente për përmirësimin e jetës së qytetareve të kësaj ane.
Musmurati e ka cilësuar të ngutshëm edhe reagimin e përfaqësueseve të disa fshatrave të cilët kanë paralajmëruar se do të marrin masa duke i vetëshpallur fshatrat komuna, nëse Qeveria nuk i merr parasysh kërkesat e tyre.(Tribuna)
