Recetat e preferuara të Presidentit

Cilat janë ushqimet e preferuara nga Barack Obama? Cilat receta pëlqen? Cilat janë ushqimet që nuk pëlqen? Duket qartë që ndryshe nga shumë bashkëkombës, Obama pëlqen të ushqehet në mënyrë të shëndetshme .

Barack Obama është me siguri mes presidentëve të Shteteve të Bashkuara të Amerikës më në formë. Të paktën për aq sa mund të na kujtohet. Është e njohur dashuria e tij për basketbollin, kohë më parë hoqi dorë nga cigarja dhe mbi të gjitha pëlqen ushqimin e thjeshtë: ushqehet pa e tepruar dhe i beson gjithmonë recetave të përgatitura nga gruaja e tij Michelle, e cila për të “është kuzhinierja më e mirë në botë”. Por çfarë ha Barack Obama? Cilat janë ushqimet e tij të preferuara? Po ato që nuk i pëlqen aspak dhe nuk i fut kurrë në gojë?

Në mëngjes, Presidenti thotë se në tryezë nuk mungojnë kurrë disa lloj frutash të thata (arra, lajthi dhe rrush): një bombë e vërtetë plot energji me efekte shumë pozitive për shëndetin e mbi të gjitha, për lëkurën. Jo më kot, Barack Obama duket aq shumë në formë dhe nuk e tregon aspak moshën që ka dhe në fytyrë nuk i dallohet asnjë rrudhë. Edhe bajamet dhe kikirikët janë pjesë e mëngjesit “presidencial” të Barack Obama-s, por në këtë rast Presidenti duhet të jetë më i kujdesshëm ndaj sasisë, duke parë kaloritë që përmbajnë këto ushqime, sidomos të karamelizuara.

Ndryshe nga amerikanët e tjerë, shumë fanatikë ndaj pijeve të gazuara dhe me sheqer, Obama preferon të pijë shumë ujë mineral. Një zgjedhje shumë e mirë kjo, sepse ashtu siç studimet tregojnë të ashtuquajturat “soft drinks” me sheqer të shtuar, kaq të përhapur në SHBA, janë një ndër shkaqet kryesore të obezitetit andej.

Edhe perimet e freskëta, mbi të gjitha brokoli dhe spinaqi, janë shumë të pëlqyera nga Barack Obama. Nuk është rastësi që Zonja e Parë, Michelle, ka këmbëngulur kaq shumë për ta mbjellë një pjesë të kopshtit në Shtëpinë e Bardhë me ushqime biologjike, për të cilin kujdeset personalisht dhe që ka qenë një kartë fituese në komunikimin për të përhapur një mesazh pozitiv mbi rëndësinë e ushqyerjes së shëndetshme.

Por as njeriu më i pushtetshëm në botë nuk është imun ndaj “joshjes” së të ashtuquajturave “comfort food”. Për shembull, Presidenti çmendet për çokollatën artizanale të punishtes së famshme të Siatëllit “Fran”. E gjithmonë për sa u përket ëmbëlsirave, mes recetave të preferuara të Obama-s është edhe “Apple cobbler”, d.m.th torta tradicionale me mollë e Zonjës së Parë Michelle. E çuditshme edhe lista e ushqimeve që Presidenti amerikan nuk preferon të hajë (për të cilat kujdeset stafi i tij kur është i ftuar në ndonjë drekë apo darkë zyrtare).

Ato që kërkon të shmangë domosdoshmërisht janë majoneza, patatet e skuqura, asparagët dhe rrepat. Në fund, ushqimi italian është një pasion i madh për Barack Obama-n. Duke filluar që nga pica. Piceria “Italian Fiesta” në Uashington e klasifikon Presidentin mes klientëve të saj më besnik. Po kuzhina amerikane? Pëlqehet shumë nga të bijat Sasha dhe Malia, të cilat çmenden për pulën e skuqur dhe makaronat me djathë.

Torta me mollë e Michelle

Recetën e kësaj torte me mollë që e përgatit Michelle e për të cilën Presidenti Obama “çmendet”, Zonja e Parë e ka treguar për herë të parë për revistën amerikane “Yankee Magazine”. Bëhet fjalë për një recetë tradicionale amerikane, të cilën Michelle e përgatit ndonjëherë edhe gjatë ndonjë pritjeje zyrtare në Shtëpinë e Bardhë. Jo vetëm që është e thjeshtë, por një herë në kaq kohë mund t’ia lejosh vetes: mollë, gjalpë, qumësht dhe sheqer. Megjithatë nuk bëhet fjalë për një tortë të thjeshtë, po për ato që amerikanët i quajnë “cobbler”, një ëmbëlsirë që i ka rrënjët në kolonitë e para amerikane.

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).