‘Rebelohen’ përfaqësuesit e Luginës

Ratifikimi i marrëveshjes nga Kuvendi i Kosovës me Serbinë ka ‘rebeluar’ përfaqësuesit e Luginës së Preshevës. Ata kërkojnë të drejta të barabarta për qytetarët e Luginës me ato të serbëve në Kosovë, e veçanërisht në veri të vendit. Në të kundërtën ata paralajmërojnë se do t’i përshkallëzojnë veprimet e tyre.

Lideri i Lëvizjes për Progres Demokratik (LPD) me seli në Bujanoc, Jonuz Musliu, ka thënë për Tribunën se do të bëjnë presion te Qeveria e Kosovës që gjatë bisedimeve në Bruksel të kërkojë reciprocitet të të drejtave të shqiptarëve në luginë me ato të serbëve në veri. Sipas tij, Qeveria e Kosovës duhet ta kushtëzojë zbatimin e marrëveshjes me Serbinë me dhënien e të drejtave të barabarta të qytetarëve në Luginë.

“Është momenti kyç që edhe kryeministri Hashim Thaçi, çfarëdo të drejte që i`u japë serbëve në veri, duhet të kërkojë pikë për pikë të drejta për qytetarët në Luginë, përndryshe nëse Serbia nuk i respekton shqiptarët, atëherë do të kërkojmë nga Kosova që të stopohet marrëveshja dhe mos të lëvizet në zbatimin e saj”, ka thënë Musliu.(Tribuna)